خل أعرفكم على بو خليل أول شي . بو خليل انسان على باب الله يسوق تكسي
وكل يوم يطلع من بيتهم ويروح يقعد بالمقهى الشعبي ، وهو بالاساس مايعرف
أحد هناك لكن سوالفهم جازت له وصار يروح كل يوم
يقعد صوبه واحد متقاعد ينقال له بو أحمد ونقدر نقول عن بو أحمد أنه
الفلتر لأبو خليل يقعد صوبه ويعطيه ملخص النقاشات والسوالف الي تصير
وصل بو خليل كالعادة للمقهى وقعد مكانه المعهود ، شافه بو أحمد وعطاه نظره
شوي وجاي لك زهب روحك ، طلب بو خليل الشاي ووصل صوبه بو أحمد
بو أحمد : ها بو خليل اليوم امبجر بالعادة كله متأخر عن السوالف
يقول له جذي على أساس يفتح الموضوع
قال له بو خليل : ها شسالفة شعندك قول ؟
عدل قعدته بو احمد بعد ما حصل الضوء الأخضر وانطلق
بو أحمد : أسمع بو خليل الهبه هالأيام يقول لك عن البورصة الأمريكية ، يقول لك
تحط فلوسك والأسهم صاعده ، ترامب مضبط الوضع والتوظيف عندهم فوق رايح
حسب كلام بو جاسم (خبير المقهى ) يقول لك المستثمرين الكبار قاموا يشترون
الأسهم وأرباح الشركات قاعده تزيد
وبو خليل على نياته ، بو أحمد صايده بس يبي يشاركه بالفلوس على أساس يمشي
مع الهبه
وافق بو خليل واشتغل مع بو أحمد على أن مقروص منه وخسران في النفط من أخر
هبه صارت مع هذا قال وش ورانا الناس ماشيه والكل يتكلم أنا بمشي معاهم وبوجاسم
أخبر واحد في المقهى وفاهم السوق
واقعنا الحالي وللأسف ماشي على وقع ( الهبه ) في كل أموره خاصة بالاستثمار
عزيزي المستثمر والمتداول ( فلوسك ) لابد أن تستثمرها بشكل صحيح وفق رؤية
وأفق واضحه .
نصيحتي لك : أبتعد عن الهبات
